Renato Alzadón
I Renato Bonus Alzadón metung yang wátas a Filipínu king amánung Kapampángan, pepasálâ king "Sulû ning Malagûng Paniúlat Kapampángan".
Talambie
mag-editLinto ne ing metung karing taung malambat danang panayan ring alagad ning lakaran king panyulung ning kalinangan Kapampangan, ini ya i Renato B. Alzadon, anak neng Florentina Bonus at ning meging Consejal king Capas, Tarlac, Pedro Alzadon. Tubu Aranguren, Capas, Tarlac, I Renato agyan mang malambat neng manuknangan king Baltimore, Maryland, king Bansang Amerika, ali na kelinguan ing pigmulan nang kalinangan at sisuan a Amanu. Anak ya pa i Renato mamikudta neng miyayaluang aske ning Literatura karing amanung Kapampangan, Inglis, Kastila, ampon Tagalug.
Pablasang itang kayang Igpa a kakaluguran nang matalik ning meging pamuntuk balen ning Capas ing meanguabie Francisco Tanglao at itang kanakung meanguabie Tata, meging Hukum Dionisio P. Tanglao, metung yang matenakan watas ning Kapampangan, anya i Renato megi yang o migit ya pa keraklan ketang kayang Tata king geling~an king pamanyulat at pamikudta.
Ing Literatura marakal ya sakup a marangle, kawatasan, dulaan, nobela, kwentu, dalit, at alwa pa. Sanu man kareni at karing alwa ra pang dake, kalupa ning pamanyulat pan-religion o king Banal a Kasulatan, i Renato aguio nalang palambutan pusu ring mangasias a diktador pati na ring pusakal, karing kayang susulat.
Pepaganaka at binyayan nalang pasibayung Renato B. Alzadon ring dramang Kapampangan parandam da kanita karing radyu king Region ning Pampanga. Ing suwala nang pang-radyu at pang-Crissotan, atyu pa kaya at malyaring lang magduyan ring darandam kabang pagtumayla nala karing kawatasan nang Pangkasalesayan ning Yatu o ning Balen a kaluguran, kalupa ning gewa na king DZAB king Angeles ketang kayanakan napa.
Nung ing Pintor at Watas Rafael Maniago, Jose Marti ya datang, i Tony M. Peña, kasing-pinu yang Amado M. Yuzon o ning kayang inpun Monico Mercado, ining Renato B. Alzadon eka mag-aduang isip ilimpi ya kang Rizal. King marangle ning pamananam, marangle ning kabayanijan pamilaban, balu na ngan, at kalupa na namang Rizal, agyang aduang pulung tumpuk kabang kawatasan ena urungan isulat. Ketang anak ya king Pampangan, pituki-tuki re ring pakamalan ring aduang Poetang Laureadu Jose M Gallardo at Vedasto Ocampo, ila rin kayang anting "idolo" liban king kayang Tatang. Ring watas areni ela bisu-bisung papakit karing eganagana rang gawa, pauli ning balu re katindi anting "tape recorder" ing kayang memoria. Balu re ring mesambitlang matenakan watas itang kasebyan a - "maralas ing tiru, migit ya pa king mituru."
Dakal lang metula at mangabiasa karing susulat at tuturu nang Renato ngeni king dalan ning aptas, pauli nini pasalamat la at akilala ne i Ernesto C. Turla, metung pang talagabe, manimuna at masipag nang pastul ning Kalinangan. King kayang pamanintun kasulatan king Amanung Sisuan disan ne i Ginung Turla king aptas, anya milage yang pasibayu at payaslagan ne ing Literatura at Sining Kapampangan. Salamat karing miglalang karing makinang panyulat ampo king pangatalakad ning aptas, pauli ra ing pamisanmetung at panyulung ring diwang pankapayapan ding alagad ning Kalinangan masala lang lalung mipaltutu.