Fiksion

Ing fiksion ia ing presentasion ning metung a imahináriung yátû king reseptor.

Ehemplu

Ing sigienti metung yang ehemplu ning fiksion, tituládung Ing Kakung Damulag at eskritu nang Renato Alzadón, wátas a Filipínu.

Biseru ya pamu iniang dala neng Jose Baraku king Patyu, a nung nu mi kasalukuyan padarang talyadora ing pupul a Benzer. E ya paman kapun. at ala ya pang lagyu nung e Biseru. Tambing keng aburi ing malapad nang bulas at ing timbang nang balangkas. Ulinita, kaibat ming misabi ning Matua, tinggap ke ing aluk nang Jose Baraku, at beyaran keng pitung kaban a Benzer ing biserung damulag.

Meragul ya king gamat ku ing Biseru. E ke pa pin adinan masanting a lagyu uling e ya pa mekintal at e ya pa mekapun. Ing balak ku sana, potang makintal at makapun ne, kanita ku ne dinan lagyu, ketang kabague na mo sana. Pansamantala, anti ning e ne biseru, inaus mi ne pamung Bulugan.

Kabud mebaintau ya Y Bulugan, lalu yang lingkas a tikdi. Atmu ne kasanting talakad a balamu wari maragul ya kompiansa keng sarili na. Potang yatna ne ing kayang buntuk, maglulun ing laman king maragul at malilimukmuk nang tundun. Ding sagu nang kasantingan kaba at malantik panga-alkus kinang-kinang la king kalinis uling parati na lang tatais kareng matas a pilapil. Malati ya atyan a malapad a salu. Neng talakad ya ketang babo nang rampa ning paligi saslag ya ing larawan na ning metung a matatag, matapang, masikan, masanting, at maki-kayabangan a damulag.

Linto yang mayap a damulag Y Bulugan. Keng panaun ning Bibili, yang apanaligan ku keng pamamaligtad ampon pamamalbal. Atmu ne panaman kaganakang gamitan keng pamanyable pilapil. Inya kaibat memaligtad, makayagap kung makatipun danum uling agad lang mitakpan keng pamanyable deng tagubana. Ing buri ku pa kang Bulugan ya itang kaibat keng peg-obra, at sinoga ke king Gasak, e ya man magkera, nune agad neng mangan. E ya pa naman maselan, agyang yang Kanubsuban at Pale-palayan panggigutan na. Inia agyang mapagal ya keng obra keng marangle, e ke akakit mayayayat.

Nung mayap ya Y Bulugan neng panaun ning Bibili, lalu ne man lalto kayapan king panaun ning Sasagmit. Pangaras keng pamanakut pale, yang apanaligan ku Y Bulugan. Agyang itang Lulunak a e ra luluban maka-garosa, luluban keng makagareta. Magsilbi ya Y Bulugan agyang yang atyu keng manu o yang atyu keng sikoti. Ing sintingan namu nung yang atyu keng sikoti, ing atyu keng manu e malyaring e ya gulyut. Uling nung e ya gulyut, pati ya man iguyud nang Bulugan. Ulina nyan maralas kung manaliling guyud ampon paud. Nung misan agyang bayu ya ing guyud, nung mikatagun a e ya timbang a panga-abit mapatlud ya. Makanian mu naman karen paud, nung miras ketang patagilid ya panga-abit mapakli ya naman. Uli pin maragul ya tundun, e na basta paud malyari yang gamitan. Inya indat manakit kung bayung alsut a labung kwayan, agad ku nong kakabitanan panulmang paud bakung atin makareserbang panalili karing paud a mangapakli.

Bulalag ya king baryu ing sikanan nang Bulugan. Nung nukarin atin makabara, yang pakiduang da para manangu. Misan a aldo atin mibarang mag-traktora king makasiping a asikan. Pekisabi de Y Bulugan para igutan ne. Mipamulala la ding dinatang a magtraktorang tau Bulacan king sikanan nang Bulugan. Ustung yinaya ke saka ke pepamaltukan ing latiku king angin miglangingit la ding bayung guyud at sinaka yang pakakalale ing Traktora king panga lunak na king burak.

"Lintik naman Kalabaw yan, ngana ning Tagalog, para bagang Kapampangan!" "Nanung buri mung sabian, abe,?' "Di ba ang Kapampangan ay malakas, matapang, makisig at may kayabangan?" "Nung king bague." "Anong pangalan nang kalabaw mo?" "Ala pa. Kasi, e pa mekintal at e pa mekapun." "Bigyan na natin nang pangalan. Tawagin natin Kapampangan!"

Ding anggang makapatulug a manalbe makanayun no man. King penandit aita, agyang e pa mekintal at mekapun, waga ning pambijira nang kaguiwan, ing bulugan a damulag mipamalagyuan yang Kapampangan. Tutal atin ne murin lagyu, ngakung sasabi, Y kapampangan, e ku ne pakapun. E masanting daramdaman, nung ing magdala king lagyung Kapampangan, ala yang bayag!

Kauli ku bale belita ku ing milyari king Matua. Makanayun ya mu naman king miyalilan ne lagyu Y Bulugan. Buri ne mu naman ing lagyung Kapampangan, kabague ne kanu ning damulag a masikan, masanting at matapang. Kabang babalita ku ing guewa nang pamanigut Kapampangan king traktora, mekad king e ku sasaryan, mipnu kung diwa king pamag-istoria ku king Matua. Keng pamag-aksyun ku at pamagsalita talagang pagparangalan ke ing kakung damulag. Ing mapagumasid kung Indu, makanian yang sinalabat at mekitambulug.

"Ot balamu ata, anak, nganang timan-timan, "ing damulag mu ya mu ata ing Kapampangan?" "Bakit naman, Ima?" "Ya na mu ing daramdaman ku ing kayapan na. O'bat e ku daramdaman ing keka?" "Nanu naman ing sabian ku?" "Aba! Magmayabang na ka man bagya, Itung. Tutu kang tahimik pangaras keng sarili mu. Nung balu meng sabian ing kayapan ning kekang damulag, balu mu neman sanang sabian ing keka. E naman masanting keng maibug nang mag-baintau ing makanian a alang kayabang-yabang. " "Y Ma ku naman. nanung pagmayabang ku? Ala naman." "Nanung ala? Neng atin bulaklakan ken, ikang ari. Nanu man kimutan kayanakan ken, ikang buntuk. Makagulis nakaman keng boksing ampon keng arnis. Makisintingan ka pa naman bagya. Inya, magmayabang nakaman sana, Itung. Balamu e ka kapampangan!"

Dinatang ing Panaun na ning Bubulus.

Ketang lulunak a Bana, nung nukarin ya masusukad a galing keng pamanakut, karin ke bubulus Y Kapampangan. Deng sadya nanang kakuyug ilang abe nang maglaput ketang berding dikut a tutubu karin. Agyang kaseng magkaleldo man, mamasa-masa ing gabun, at ketang parting bubuyun, ing dikut e lubusan matutuyut. Ketang saug a maki-sibul karin la maglungad-lungad neng kapali-palian na ning aldo. Pamisan-misan, atin daratang a damulag a manibat king bandang makababo, dapot e la malyaring maglambat karin, panagalan nalang Kapampangan. E na paintulutan Kapampangan king ing labuad a pagkarinan na, masalampitak ya karing daratang a manyalaulang banyaga.

Pangaras keng saguan, ala yang atrasan Y Kapampangan. Deng mangatapang a damulag a daratang mamuska kaya mumuli lang pupulayi. Subali keng matapang ya at masikan, biasa ya pang maki-saguan. E na nala kabud pakipantukan deng sagu na. Ing metung karing gagawan na ya itang bigla yang sagudsud, kaibat bigla yang matras, saka ya talindiking, at saka ne saguan king tagyang ing kalaban na, inya makanian lang mangasubsub. Potang titikdo ya kanita ne paniaguan a buldit inya kadalasan mamulayi nala mu deng akakalaban na. Basta milayi ya ing kalaban na e ne patugutan panagalan at paniaguan a buldit angga king ayatad neng muli king tuknangan na ning kalaban nang damulag. Karing pepapulayan na kabilang de ing Maragul nang Apung Cenon, ing Baluki nang Bapang Imung, ing Kalakian nang Tatang Teo, ing Bupalo nang Tatang Syanu, at ing Kalakwe nang Matuang Mindung.

Tungkul naman kekaming kayanakan a supling ning marangle, ing panaun ning Bubulus , yang peka-maligaya ming penandit. Ibulus mila ding damulag king marangle,at agyang e mi la saklitan, mumuli lang dili ra pamanyatang ning sisilim. Iti ya ing panaun ming mamialung king lalam ning Mangga, nung nu ke magbitin-bitn kareng baras, at magsane barug karing tangke ning Salbak a gagawan ming tukud. Nung misan, mamialung keng Tetsing ampon Kara Y Krus king maliwalas nang arap bale Matuang Teo. Misan a panaun na ning Bubulus atin dinatang a kayanakan a menibat king Menila. Pangunakan ne ning taga-Menilang asawa na ning Maestro Caesar Gomez. Agpang keng akalap kung balita, ining kayanakan a Tagalog, metung ya kanu karing siga-siga na ning Tondo. Siguru pin, uling ugali na ing maglakad alang pambabo imalan a balamu wari pagparangalan no ding malaswang tatu king kayang katawan. Linto yang mapanabusu karing kayanakan king Baryu. Buri na pitatakutan yang balamu yang damulag a bulugan. Balang piswitan na buri na agad lumapit, uling nung yang lumapit, katusan no buntuk. Deng anak a e makalaban, angga na mu keng mumuli lang kikiak. Dakal ya akatumbukan karing kayanakan king baryu, oneng uling sane ya ata keng bugbugan, inya apapagaga na la dening kayanakan a e naman makasane keng pate. Neng makialung neman, maski na keng tetsing o kaya kara y krus, buri na pane yang sasambut, uling nung masasambut ne, siguradu yang mamirait. Angga mu king muli keng tumbukan nung nune man magaling. Ding kayanakan king Baryu, pemalagyuan deng Taglugan! Ing buri nang sabian nita, Tagalog a bulugan!

Ding mamuntukan king Baryu , panimuna nang Bapang Juan a Tenyente , pekisabian de Y Maestro Caesar king paulian na ne sana ing pangunakan na ning asawa na king Menila. Tinutul ya Y Maestro Caesar agyang mikaluguran la pang Bapang Juan. Agpang kaya, ala lang karapatan deng pamuntuk baryu para itabi de ing metung a tau kabang alang titipang kautusan a manibat king korte. Ing amanuan nang Bapang Juan a Tenyente ya ing kapayapan na ning baryu, aliwa ing batas. Oneng Y Maestro Caesar, pakiduang ne pamu ing dokumentung menibat king Hukum ning Balen, bayu ne paulian ing Tagalog. Masakit ya lub ing Bapang Juan a Tenyente kening kapanutulan nang Maestro Caesar. Kabang makatipun kami ketang pidadaran a patyu, pakisabi ra ding kayanakan king manus neng gamat Y Bapang Juan a Tenyente at ila na kanung bala. Ing buri nang sabian nita, pamasibasan deng batu ing bale nang Maestro Caesar bengi-bengi anggang e mabating ing Tagalog. Oneng, Y Bapang Juan a Tenyente, e ne inayunan ing anti kanitang munikala. Inawad na king misip ke pang aliwang paralan.

"Ikayung kayanakan keni a kasisindagul at kasising-edad nang Tagalog", nganang Bapang Juan a Tenyente, "akatumbukan na nako ngan?" "Opu", nganang susumbung Seung, "akatumbukan na nakengan. Subali mu pu keng pangunakan yung atyu keng siping yu."

At belikdan na kung Bapang Juan a Tenyente.

"Makanian naman pala, eh. O' ngamu paya abe kening pisasabian aini?" "Itustus ye Y Tagalog", ngaku naman mekibat, " bukas king arap nang bale Matuang Teo, nung nu tamu mag-tetsing. "Makanian pin, Itung, nganang Bapang Juan a Tenyente, masyadu na kamang e bularin. E masanting Itung keng mag-baintau na ing magma-mahinhin. Magmayabang na kaman bagya. Balamu, e ka Kapampangan!"

Kabukasan, king arap nang bale Matuang Teo, akalaban ke pin Tetsing Y Tagalog. Ing pisabi, basta kinimut ya ing batu, mituran ya. Kena mila ding taya king kuadradung gulis king gabun. Ding kaku, lima lang mamera, at ing kaya, metung yang singkung pilak. Inatsa mila ding kekaming batu king pasigmanuan a gulis. Yang mimanu, at inatsa ne ing batu na king lugal a makakambil a malapit karing taya. Inatsa ke ing batu ku king dane makayabat. Tinira yang palual at sinulparit ya ing sinkung pilak. Kaibat pinggigut nong pepalual ding mamera. Migmintis ya mu inyang metung nemung taya ing makatagan. Mikatagun ing batu na dinugan yang migtilad king yamut ning dutung. Telanan ke ing batu ku atsa ka ke sinipat ing batu na. Balu kung nung e ke turan, mibagud ya ing batu ku at siguradu kung mayabut Makanian man, kailangan keng tirajan a batu na uling atyu nongan alus keng gamat na deng taya. Inya, tinira ke ing batu na at ding manalbe dimdam deng mengalaksing. Makanian man, e no buring isuku ding taya. Sasandali na king sinabe ku kanu agyang e na kuman sinabe. Agyang nanung sabian da ding manakit, e no buring ibie ding taya. Inya inagkat ku ne mung mialung pasibayu, mupin, dobladu ing taya. Mikabit kung apulung mamera king lub ning gulis at ya aduang sinkung pilak. Inyang yatsa ne at lawan ing batu na king sigmanuan, pinulut ku lang pemulsa ding taya, at ngaku kaya king e ko buring kakialung deng mapamirait. Kanyan ne mag-alsa at manamun tumbukan.

"Suntukan Tayo! Kung matalo mo'ko, iyo na ang taya, kung matalo ka ibalik mo sa'kin!" "Wa. Milaban kata. Balamumo ninuna ika! Dinatang kang banyaga kening lugal mi, buri mu ika pang manyupil!" "Talaga naman! Tagalog yata ako. Matatag kaming Tagalog, di gaya n'yong Kapampangan na mga duag na iyakin!" "Ah, makanian! Lon ta abe nung ninung muling kikiak. Ngeni ka pa misukad a galing king amanuan mung duag a kapampangan. "Yong kalabaw mo ang Kapampangan, hindi ikaw. Kundi ko pa alam na ang tawag sa'yo ay si Binibining Mahinhin" "Ustu na yang kaparatutan mu, umpisan tane ing laban."

Binalut milang imalan ding kekeng gamat at saka ke mipamustung tumbukan. Mikarakal la deng tau. Anak, makatua, babayi, lalaki, linual la ban ayalben de ing labanan Tagalog at Kapampangan king arap nang bale Matuang Teo.

Umpisa pamu mengaturan na ku lupa karing mangabilis nang pitik ning kaili nang gamat Tagalog. Ustung tumud ya pa ing wanan nang gamat king atyan ku maibug kung sayukut king kasalit uling ding gamat na balamu sagu la naman damulag. Potang akung manumbuk e ku neman aturan, atmu ne kagaling manginlag. Balu na kung paliwasan a tumbuk, at kaibat bilianan na ku king katawan, at king sikan nang tumbuk, balamu damulag na ku naman a maibug nang mamulayi. Dapot, e ku malyaring mamulayi. Nung mulayi ku, kailian na ku ning mabilug a baryu, at siguradung sabian dang mas ugali ya pang kapampangan ing damulag kesa king makidamulag. Inya, agyang mangasikan ya sirul Y Tagalog, pibabata ku na mu ing sakit, pakapasubu naku, agyang mangabukulan naku e ku malyaring kumurul.

Ban e na ku turan masyadu, lebanan keng malapitan. Panikuanan keng ilapit ing lupa ku king salu na at milaban kaming balamu misasaguanan a damulag. Kelambatan ning sagugsuran, apansinan kung lalata ya bitis. Mapalyaring makasane la king pate piraplanan ding bitis na dapot e la makakundisyun keng pangmalambatan a sagudsuran. Ding bitis kung makasane pupulayi keng aswayan, lalakad pasalsal neng mangi-uli kung mamuntuk alkus gulung garetang kumpe, at mumukyat dalerayan neng mangargang atbu neng kakabyo, lalu lang sisikan kabang lalambat ing sagudsuran Bandang tauli tutud na ing tumbuk ku king Tagalog. Dapot, ing Tagalog atmu ne katibe. Ing lupa na mengari ya wari keng gomang makunyat, inya agyang turan ku neng tamak balamu e man manasakit. Ing atyan na anti yamong bakal king kasias, inya agyang tutud ing sirul kung pasikwat, balamu e na panamdaman. Aisip ku ing manibayu kung paralan, at pakiapusan ke ing gagawan na neng makisaguan ya Y Kapampangan.

Kinangua kung tyempu. Inyang e ne pyadyan bigla keng segudsud ing Tagalog. Mengapaurung ya king sikan ning sagudsud. Inyang sagudsud ya sana, bigla keng inatrasan, inya mipabulusuk ya. Mabilis kung migbanda king katalindikingan at, kalupa na ning gagawan nang Kapampangan, binilyanan ke king tagyang. Keni pala ing maina na ning Tagalog. Kabud mengaturan ya king tagyang sinayukut ya king kasakit. At memulayi yang minuli king bale na ning Maestro Caesar Gomez. Sabi da dening makakampi kaya king dapat salikut na ku kanu, uling kunan ne ing palakul na. Keng palakul kanu, karin ya magaling, at ken de pitakutan deng siga-siga king Tondo. Dapot, alistu neman Y Mang Saru. Sinaguli apanabas nakung aduang kasantingan a kabang tanke Salbak. Maragul ya tiwala Y Mang Saru king yang balu ra deng Tagalog keng Palakul, e pa magsilbing pakiarap keng Sinawaling Kapampangan.

E ne tinipa ing Bulugan a Tagalog.

Kabukasan, abak pang maranun, inatad deng maka-kalesa Y Tagalog king balen. Pepa-ulian de Menila. Milako la kabag a salu ding kayanakan king baryu. Mebating ne ing dinatang a Tagalug a bulugan.

Karen naman damulag, e ku ne abubulus Y Kapampangan. Ing gagawan ku papastulan ku ne mu neng abak a maranun king pampang na ning paligi bayang makasangap marimlang ambun neng abak. Kabud minukiat ne ing aldo, yuli ku ne, at pakanan ku ne mung are ampon bulung atbu. Makanano, pane reng amunan saguan deng daratang. Agyang isoga ke pa king Gasak, lapitan de mu rin deng mamuska kaya, at potang managal ne mabagut ya mu ing tulus. Ing makatakut ya ing sasalimparang tulus potang managal ne, uling nung atin mituran, siguradu yang manasakit. Mayap a mayap nung alang masasaklit a batal keng lubid ning tulus uling Y Kapampangan, e ya tuknang tatagal king mamulaying akalaban na, at alang malyaring makasabat!

Agyang e ku ne bubulus Y Kapampangan luluban de pa mu rin dening makabulus a damulag king mula ketang pitatalyanan kung kwayan nung nu ke pakanan. Makanano, dening damulag a babay a bisang magpabuktut kaya, pupuntalan de. Ing malilyari naman, deng lalaking tatakiki king babaying damulag pakipaten de Y Kapampangan. Agyang pekamatibe neng lubid ing panali ku kaya siguradung patluran ne patye atin linub a mamuska kaya. Inya, e lumabas ing paruminggu a ala mosang damulag a e muling sugatan a buldit nung e man king tagiliran. Ngeni naman, dening maki-damulag, pane reng susumbung Y Kapampangan kang Bapang Juan a Tenyente. Sasabian da king Y Kapampangan misusubi ya kanu bengisan a tatakut lang datang ing aldo, pati na tau panyaguan na. Kaministilan mu, king Y Bapang Juan a Tenyente pakisabian naku, at aduan nang pakapun ku ne Y Kapampangan para king katahimikan da naman ding damulag king baryu.

"Masakit na ku buntuk, abe karening susumbung a tau. Pakapun tane Y Kapampangan." "Y Bapa ku naman, O'bat keka la susumbung. O'bat e la sumbung kaku." "Medyu kikindingan dakang bagya , abe. Ibat inyang pepapulayan me Y Tagalog, mamikakanu lang lumapit keka. Pota kanu, ila naman ding amunan mung saguan, inya kaku la lalapit. "Lon mu naman, Bapa: Aliwa Y Kapampangan ing mame manabusu kareng damulag da. Y Kapampangan yang daratangan dang abusuan king lugal na. Ibat king samula, Y Kapampangan e ya lilibut manintun pate, yang pupuntalan dang pakipaten. Nung Y Kapampangan yang lulub keng sular da at panyaguan no deng damulag da, kanita asabi tang e ustu ing gagawan nang Kapampangan at dapat ya pin kapunan. Dapot nung ding damulag da ilang lulub king sular nang Kapampangan, nung misan adua o atlu la pa deng datang manamun kaya, Y Kapampangan kaya ala yang karapatan maglualu keng sarili nang bie? Kabud na nala wari pabustan a sugatan deng alang laban? Nanu neman justisya ing makanian, Bapa? Nung ninu na pin man luluban dang pakipaten ya pang buri dang makapun! Ustu naman wari ing makanian?" "Ing amanuan ku, nganang Bapang Juan a Tenyente "ya ing kapayapan na ning baryu tamu, aliwa ing ninung atyu king matulid. Kalupa na nitang pangunakan naning asawa nang Maestro Caesar Gomez, e taya wari buring mako kening baryu tamu ban keta mika-atin kapayapan, at tuknang na ing tumbukan?" "E te malyaring pakilupa ing situayun nang Kapampangan ketang dinatang a Tagalog. Ing dinatang a Tagalog ya ing manabusu, ya ing manyupil karing disnan nang kayanakan. Ya ing manamun at sasabing mangataloti la deng Kapampangan. Nanupata, Bapa, ing Tagalog linub yang manyupil, samantalang Y Kapampangan ya naman ing susupilan. Ing Tagalog dinatang yang makipate, Y Kapampangan paglualu ne mu ing sarili na neng datangan deng pakipaten!" "O' sige abe, simbut mu naku keng matuliranan. Pero, aku nang makisabi, e anting manungkulan nune anting Bapa mu, pakapun tane Y Bulugan. "Saka tane pisabian yan, Bapa. E na magluat datang na ing panaun na ning Pamamili. E ke buring akit masugat Y Kapampangan, uling yang kapanalig ku king pamanasik." "O' dale makanian na mu. Sabian ku kareng magdalum kang Kapampangan king milako no ding bayag na kaibat na ning panaun ning Pamagligpit," "E ke apakibatan yan, Bapa.

Mikawani keng Bapang Juan a Tenyente. Likuan nakung gulu pamisip. Eku balu nung nanu ing mayap daptan. Tatakut kung pota nung milako ya bayag Y Kapampangan, mabating ing kayang sintingan, tepangan, at sikanan. King aliwang pangasabi, mawala ing kayang kayabangan a pagmayabang ku naman. Dapot, king aliwang panig, malda no man ding makiduang ing makapun ya sana.. Ing pamuntuk ning baryu ya na mismu ing makisabi. Makarine ing magpa-ali kang Bapang Juan a Tenyente, lalu na, tegawan ke pa naman king Kumpil. Nanu kaya ing gawan ku? Dapat kaya o eya dapat makapun Y Kapampangan?

Milabas ing panaun ning Pamamili at dinatang ing panaun ning Pamanyagmit. Kalupa ning sadya, ing sikanan nang Kapampangan keng pamanakut makagareta yang e ku pikakunuan pagmayabang. Mekulili ne ata balugbug ing siping kung asikan a Y Seung keng daramdaman nang gelingan nang Kapampangan, inya kabud apisali na ing kayang pupul sinali yang metung a matikding damulag a menibat pa king Malolos Bulakan. Kabang dadara keng Talyadora king patyu, dela neng Seung ing matikdi nang damulag a pemalagyuan nang Tagalog. Kababalangkas neng Kapampangan, mayabang ya naman talakad, saka malimukmuk ya naman a tundun, uling e ya kanu agad mekapun. Agyang e pa mesubuk a galing Y Tagalog, dapot keng tanya ra deng kalupang manasik, e ya mitauli kang Kapampangan.

Misan a aldo Domingo, kabang magbaras kami king lalam manga, abatyawan ke Y Tagalog a linub king mulahan king Talimunduk. Megumpisa ya king pamanadyad na king pun ning akasia, at kaibat tiglusan ne ing pun ning sagin a Butulan nung no tinais ding kayang sagu. Agad keng pintalan Y Tagalog ban dakpan ke sana uling pigaganakan kung lapitan ne Y Kapampangan. dapot meko yang memulayi. Penandit ikit ke Y Seung at sinabi ku kaya king linub ya king mula Y Tagalog, at babanten ne sana pota balikan neng alisuasan Y Kapampangan. Sabi nang Seung king panintunan ne pin Y Tagalog uling mebulus ya kanu king pisogan. Tiru ke nung nuya migbanda, at mine ya pin Y Seung ban dakpan ne ing kayang damulag. Aku naman, linipat ke Y Kapampangan banda king malub king mula, at tinali ke lalam ning santol nung nu ke dininan are. Ken mong lub ku, yaring malub ne king mula, e na ne puntalan buskan Tagalog karin.

Mikatagun dinatang ya Y Kong Pelis a konsehal, darala ne ing Manuk nang Talisain. Buri ne kanung ibugnus kang Malutu, a sinambut nang mekatatlu. Tiki ke king lalam Manga nung nukarin ya makatulus Y Malutu. Kaibat milang pisikaran, bebatan milang tali taid. Pepatuktuk mila laman buldit ampon king palung balang mikapali buntuk. Kaibat pibugnusan mila. Ding magbaras minta lang menalbe king bugnusan. Uling masanting lang mamarug ding manuk, akalimbatawan ke Y Tagalog. E ke ikit linub king mula. Kabud-abud na mu, dimdam ming kukurug ing gabun, misasaguan no palang Kapampangan. Ing lubid nang Kapampangan mepatlud ya king libutad tanda ning bigla neng leputan.

Diklut mila ding manuk at ilang inalben mi ding misasaguan. Mapali ing labanan ding aduang damulag. Mamaltuk la deng sagu indat akua rang mipungkulan. Balu nong ilugal Tagalog ding kayang sagu, at gagalus la king batal nang Kapampangan. Masikan lang parehu inya alang bisang matras king karelang sagudsuran. Malambat la mu rin mipapantuk. Dakal ya galus king batal y Kapampangan, dapot nung kapilan ya mangaplas a katawan karin ya lalung tatapang. Agyang nanu mu, ala keng itsura nang Kapampangan ing mulayi king labanan. Penandit pa ikit keng biglang sinagudsud, kaibat bigla yang tinalindiking. Ustung apaliwasan ne Y Tagalug, segu neng mituki-tuki king tagyang king wanan nang sagu. Bayu ya mekapanimbang Y Tagalog, sugudsud neng Kapampangan angga king mangapasiklod ya king gabun. Kabang titikdo ya Y Tagalog, pindalas neng piniagu king gulut at balang sikwat ding sagu na lulugut king buldit nang Tagalog. Penandit pa, pupulayi neng minuli Y Tagalog kabang panagalan neng panyaguan a buldit Kapampangan.

Kabukasan, kauli ku bale kaibat ning pamagpastul kung maranun kang Kapampangan, mebigla na ku mu iniang dasnan ku la king lub bale di Bapang Juan a Tenyente, Y kong Peliz a Konsehal, Y Maestro Gomez, ampon Y Dr. Beltran a Beterinanryu. Belita ra kaku king kaibat-ibat da pamu keta kari Seung at linawe neng Dr. Beltran Y Tagalog. Agpang kang Dr. Beltran mangalalam ya kanu sugat Y Tagalog king katalindikingan ampon king buldit. Nung mipalub ya pa kanung bagya ing pangasagu na, malamang ing mibusni ya atyan Y Tagalog, at malyaring kamate na. Nung ala murin kanung manganyaya karing sugat, e ne man kanu manganib a bie Y Tagalog. Digdag nang Dr. Beltran king lawan ne mu naman kanu Y Kapampangan.

Kabang alyup-alyupan da ing babasuk a salabat a inaluk nang Ima ku, biklat neng Bapang Juan a Tenyente ing talagang paksa ra.

"Kabang atyu ya keni Y Dr. Beltran, Itung, misanan na mu ing lakad, uling balu mu naman ing tutu yang balisa ing Beterinaryu tamu, inya samantalanan tana ing atyu ya keni at pakintal mune at pakapun Y Kapampangan." "Kapamu, Bapa. Balamu ata, ing lalto sangkang inya dapat yang kapunan Y Kapampangan uling mangalalam ya sugat Y Tagalog. Dapat mu king abalu yu, Y kong Peliz atyu ya keni at ya man balu na, Y Tagalog yang dinatang a manggulu kang Kapampangan. Ing tutuna, sibyanan ku ne Y Seung king lalapitan ne ning damulag na Y Kapampangan. Inya nung mengasugat ya Y Tagalog, ya at ing maki damulag ing dapat parsalanan, aliwa Y Kapampangan. Nung ding balang maglualu keng sarili ra, at makanian naman ing gagawan nang Kapampangan ibat king samula, kakapunan la dapat, mengakapun no ngan sana ding bayaning miglualu king balen salang karing dinatang a manlupig!"

"Tutu ne mo ing keka", nganang sinalabat Maestro Gomez, "dapot anting Talaturu, buri kung abalu mu king yang makasalansang keng agus, nung wari sana keng mamangka, e manayun. Inya, makisausig ka sana karing keraklan. Menasa, kapun langan ding damulag keti, inya paki-tulad mu ne ing damulag mu karing keraklan ban e ya maka-aliwa." "Nung ding anggang damulag, Maestro, kapun nongan, at ala nang lalto maka-kalilwa pa, ing malyari, nung tukian ya ing salita yu, Maestro, mika-kayangganan ne ing laji ra ding damulag. Uling ala nang lunto bulugan a maglahi. Ding anggang lalaking damulag kapun nongan! Ngeni nung sabian yu kakung atin mapilan a mitagan ban mamalipi, bakit aliwa pa Y Kapampangan? "

"Makisalabat na ku mo", nganang Kong Peliz, " balu mu kapatad ing para mo kanaku, ya ing kapanamdaman da ding kabaryu. Ing buri kung sabian mika kapanatagan lang lub, nung balu rang ing damulag da e ya kabud na muling sugatan o panagalan nang Kapampangan."

"Keng datang ning salita mu, Koya," ngaku naman, "yang pakibalak mu ing kapanamdaman tau. Ing kapanamdaman animal e me ata pakibalak. Deng animal, koya, atin la naman kapanamdaman. Deng animal koya, atin la naman matulid. Para kanaku, koya, Y Kapampangan e ya kabud na animal, nune metung yang kabilang na ning pamilia. Miguit yapa king metung a kakaluguran. Yang kayantabe ku king kasakitan king marangle. Nanupata, e ya aliwa kanaku Y kapampangan. Ika mo kaya, Koya, nung ing anak mu, mikatagun mung e re kalupa pamirapat-dapat ding keraklan, mabisa na kaman kayang pakapun me? Nung pagmasakit me matulid ing miembru ning kekang pamilia, makanian keng pagmasakit a matulid Y Kapampangan uling, asabi ku na pin, pamilia ke!"

Belikdan neng Bapang Juan a Tenyente Y Dr. Beltran.

"Nanu ne man pu ing para kekayu?" "Masanting yang mangatuliran ing anak", nganang Dr. Beltran, " balamu ata, kumaba ya pa ing pisasabian. Aku pu, gagampan ku mu king tungkul ku. Nung atin pung makisabing kapunan ke ing damulag da, kapunan ke. E ku pu babie opinyun. Ulina pu nita, bisa naku sana pung mamun. Puntalan ko pamu pu dening papangasawa rang babi kaku keni king kasiping baryu."

Mipakaili kami kening biru nang Dr. Beltran.

"Magbalik na ku mu pu." At tinikdo ne Y Dr. Beltran

"Kapamu, pu", nganang Bapang Juan a Tenyente, "kutnan ta la pu ding pengari, nung ngara paya . O' nanu Koya, Atsi, pakapun ta ne Y Kapampangan."

"Kapamu, Bapa," ngakung sinalabat," ing pisasabian keni ya ing katuliran nang Kapampangan, aliwa ya ing upaya na ning pengari. E balang binie rang kayatulan ding pengari maka-ustu; ding pengari magkamali la mu naman, agyang atyu karela ing upayang dapat king kamalian a ala king katuliran. Inya, pisabian taya ing matulid, aliwa ing kayupayan."

"Ali, Itung", nganang mengamanung Ima, "pakibalak mu ne man sana ing lunto gastus nung makapate ya ing damulag mu. Kabud na la wari manahimik deng kematen damulag at e la magdalum? Alang mumunang sisi, Itung, inya ing masanting pakapun mu ne Y Kapampangan."

"E naman ing ala kung galang kekayu", ngakung sinabi," dapot ing amanuan yu tungkul ya keng pera, at e ya maka-akama keng matulid na ning damulag. Kase, nung atin kung perang pamayad kareng mangamate damulag, Y Kapampangan e ya milako bayag. Nanupata, atyu keng gamat ning atin pera ing katuliran. Inya ing damulag, uling ala yang pera, ala yang matulid?"

"O dale, pu," nganang Dr. Beltran, " paidalan na ku mu potang gatpanapun." "Ali pu", ngana naman ning Matua, aku na pung balang makisabi kening anak. Sige, saupan ye ing Beterinaryu tamu, at kapunan ye Y Kapampangan. Karas keng matuliranan, e ye sambutan ini. Inya sige na, lakuan yu na kami, ikami nang misabi.

At likuan da kami pin ning Matua. Agpang kaya, ing pamakiabe yang dapat papagbabawan kesa keng katuliran. Ing pamakipag-parang tau mumuna ya kesa keng matulid na ning metung a tau. Inya agyang katuliran na pang Kapampangan, king lagyu ning pamakibague, pamakikaluguran, at pamakipag-parang tau, magsakripisyu ne pa ing katuliran.

Linawe keng maratna ing Matua. Penamdaman kung balamu ing wawa ku atmu na kapait. Bisa kung magmatulid, dapot nukarin ku manintun katuliran. Balamu wari, aku na mung dili kung mamulang king lugal kung beitan. Ing Maestro, ing Tenyente, ding memaryu, at ngeni ding pengari misasanmetung la king metung a kapagnasan a makapun ne Y Kapampangan. Aku namung e bisa. Anti ku waring kakawe magdili-dili, at makasalansang king atmu na kasalusung agus.

E ku mekatanggui.

Alben ku lang mengidagsa kang Kapampangan. Muna, dininan dong tali ding bitis nang wanan, kaibat sinilu dong parehu ding lubid karing bitis nang kaili. Mibili lang pun kwayan king pilatan nang bitis. Kaibat piyagnan dong inigut ding lubid, miragsa ya ing damulag. Tinali dong mahigpit ding lubid king makasalalak a pun kwayan. Legue nong Dr. Beltran ding gamit na. E man binang miglambat ala neng bayag Y Kapampangan. Kiskusan neng panulung Dr. Beltran ing sugat at saka ne teyi king sinulad, kaibat, penguskusan nang panulu ing galus na king batal kapampangan, yari ne Y Dr. Beltran. Kayari na, memun ne ing Beterinaryu, uling manenaya la pin kanu detang buktutan nang babi.

Atmu ne kalalagwang milabas ing pabulan. Kayap ne sugat Y Kapampangan. Makanian man, e ke pa mu rin lalague. King malapit king bale mi karin ke tatali, ban alang makalapit mamuska kaya. Pakanan ku ne mung kumpe, bulung atbu, ampon are. Painuman ku ne mu ampon paniabugan king masasaklung danum king malapit a Talaga.

At linakad la pa ding aldo.....

Misan a abak a maranun, legue keng pistulan Y Kapampangan king baidbid nang atbung Matuang Mindung a malapit king Kampusantu ding Iglesia. Inyang saslag ne ing aldo, siniku ku ne Y Kapampangan ban kanita muli na ke sana. Ustung kalampas mi king Kampusantu da ding Iglesia, bigla neng tinas ing buntuk nang Kapampangan. Inyang malikid ku nung nuya makalawe, ikit ke Y Tagalog ketang babo nang rampa ning paligi, makatas ya buntuk a balamu wari manamun yang labanan. Dinalan king isip ku king maranun neng binulus Seung ing damulag na king gulut dang bale. Maliksi kung kinuldas kang Kapampangan, at ing panyapin kung linggotsi ginamit keng pemampan king mata na baneng e pansinan Y Tagalog. Memulut kung batu ampon buliga at ilang ginamit kung pemasibas kang Tagalog baya sanang dumayu. Oneng Y Tagalog balamu talagang manintun yang saguan. Kesa king dumayu ya, tinipa ne pin man king rampa at diretsu ing datang na kang Kapampangan. Bakung e masipit, linisya ku, a deyu ku ne pin man ing longgotsing penakap ku king mata nang Kapampangan.King sakildap a penandit memaltuk la ding misalpukan a sagu. King dalan a ma-alikabuk a papunta king baryu, misagumun la king mipnung tetagan ding aduang damulag, Y Tagalog at Y Kapampangan.

At mikarakal la ding tau.

Nanan ku man balakan, e ya daig keng sikanan Y Kapampangan. Mangapaatras ya Y Tagalog indat sagudsuran ne. Metung pa, titimid neng Kapampangan itang kaili nang sagung Tagalog, inia indat mipakli ya batal y Tagalog alulugal neng Kapampangan ing sakyud na king salu. Y Kapampangan ala yang sugat, Y Tagalog dakal ne galus at malalam ya pa itang mesakyud na king salu. Metung karing sakyud nang Kapampangan tinud ya king bitis, balaku sa mapakli ya tud Y Tagalog. Kinangua yang tyempu Y Kapampangan, sugudsud ne Y Tagalog, kaibat, bigla neng telindikingan a sugudsud ne king tagyang. Mengapasubsub ya Y Tagalog, balakusa mamulayi ne. Dapot e ya memulayi! Segudsud neng bigla Y Kapampangan, at Y Kapampangan yang memulayi. Kesa king Y Kapampangan yang managal a manyagu king buldit nang Tagalog, Y Tagalog yang managal a maniagu king buldit nang Kapampangan. Inatad neng minuling Tagalog ing pupulaying gagagang Kapampangan. Inyang dasnan ke king lalam santol Y Kapampangan, mangalgal ya laman king takut agyang ala yang sugat. Makalunus ya palang daramdaman manangis a damulag. Ing sambitan na atmu na kasakit. King penandit aita, aintindian ku, ing kikiakan na, aliwa ing pangasambut na king saguan uling e ne man mesambut, nune ilang tatangisan na ding milako nang bayag. Balu na king mebating ing kayang tepangan, ing kayang kayabangan, ing kayang dangalan a pagmaragul nang makatumpak king kanuan na uling darala ne ing lagyung Kapampangan. At aku man menangis ku, melunus ku king damulag ku, at sinisi kung kapait-paitan a nung baket pepabustan keng milako ya bayag Y Kapampangan.

Manibat kanita milako ya gilas Y Kapampangan. Nung mangan ya man tamilmil na mu. Agyang ibulus ke e man maglakad. Nung nu ke likuan karin ne mu. Agyang lapitan de deng babaying damulag, e na no pansin. Ing makalungkut pa, pakibiruan de mung saguan deng babaying damulag pupulayi ne. Nung atin yang akit a lalaking damulag a maki kayabangan, agad na nang mumuling manigalgal keng takut. Itang sadyang damulag a matapang, matatag, masanting, masikan, at maki kayabangan, linual yang dungo at sidsad king kataloti. Ing dangalan nang Kapampangan mimin neng miyugse king pitak ibat ketang aldo milako ya bayag at pilayan ne Y Tagalog.

Misan a abak, maranun keng pintalan Y Kapampangan king kayang balung-balung bake sanang pastulan king Talimunduk. Ikit ke Y Kapampangan a makakera king gabun, manigalgal yang siguk-siguk. King sinag ning darala kung sulung paritan, ikit kong maglua ding mata na. At atin malalam a saingsing indat lumual ing angin king kayang arung. Yan mang damulag pala biasa yang kumiak. Kikiakan na ing lakuan na naku uling balu na king e na magluat e na ne akit pa ing matalik nang kakaluguran. Balu na king mika-kayangganan no ding masaya ming penandit king asikan. Balu na king malapit neng mapatlud a inawa. At aku man, balu ku na, inia akuman, maki lua no ding kanakung mata, uling ketang penandit aita maghingalu ne Y Kapampangan. Kambe na ning katataulian nang singap, belag neng Kapampangan ing katawan na king gabun. King kanakung pangasindak mipagulisak kung masikan!

"Ima, Tatang, siping bale, miglo kayu! Daramdaman yu ko, munta ko keni, miglo kayu! Munta ko keni, lon yu nung nanung milyari! Ima, Tatang, siping bale, ikayungan a makaramdam kanaku, munta ko keni at tangalan ye karing mismung mata yu. Mete ne!!! Mete ne Y Kapampangan! Munta ko keni, lawan ye, mete ne Y Kapampangan! Mete ne Y Kapampangan!"

Tinipa yang makaparitan Y tatang Ku. Y Ima ku atyu king kagulutan na.

"Bapang Juan a Tenyente daramdaman mu ko! Koyang Peliz a Konsehal daramdaman mu ko! Kagalang-galang a Maestro Caesar Gomez daramdaman mu ko! Nung daramdaman yu ko, obat e ko tipa, munta ko keni at lawan ye ing dilpak yu matulid a Kapampangan. Oyan Ima, Oyan Tatang, lawan ye! Sulung pin lawan ye kaluguran kung pengari, oyan ene mangisnawa....mete ne Y Kapampangan!"

At mengulangul antimong kematen, uling tutu na ku man kematen! Mete ne ing kakung kakaluguran, ing kanakung kayaduangan, ing kanakung pagmayabang, ing kanakung Kapampangan! King pangamate nang Kapampangan, balamu wari dake ne ning kakung katawan ing metanggal, antimong metung keng gamat ing melaput, metung keng mata ing mepisak, metung keng bitis ing meputut, o metung keng pangisnawa ing mebating king aktangan na ning kakung bie.

Nanan na ku man panaruan Indu ku, e na ku apatuknang kikiak, uling para kanaku, ing kikiakan ku kasing timbang ne ning yatu , uling karing pago ku, pupusanan ke ing mabayat a kasalan a pepabustan keng mekapun Y Kapampangan. Nung sanang pepakit kung tetagan , nung sanang pepakit kung tepangan, nung sanang ginulisak kung masikan king kapanutulan, e ya sana mekapun Y Kapampangan. Oneng ali, pepadalan ku king matuliranan, at e ku pepakit bengisan, e ku pepakit tepangan, e ku pepakit kayabangan, e ku pepakit sikanan, at king gewa kung ita, balamu pin e ku Kapampangan! Balamu pin e ku kapampangan, uling e ku paman mekapun, king pepakit kung telotian, linto king tambing nakung alang bayag!

Masala ne ing aldo na ning abak. Mikarakal no ding tau. Atin nang malulunus kanaku, uling aku ing kewalan. Dapot balu kung atin mu rin matula, uling ing akakit da mu ing kabayangnan nang Kapampangan, aliwa ing agawa nang kasuyuan karela. Datang mu rin ing aldo, potang makabara no ren keng labak, aganaka re mu rin Y Kapampangan. Kanita re paniniglon, paninitunan, pisabisabian, dapot ing Kapampangan a amanuan da, ala na yu!

"O' nanu, abe", nganang Matuang Sarung Barberu, "katatan ta ne?" "Tutal, e ne man mete keng sakit", nganang Kong Peliz a Konsehal, "mete ya yan keng pamagmalun, ba't mo e ta ya pisasagsagan? Pamale me, abe, ban atin magbalik a pera agyang magkanu mu." "Wa pin, koya," ngana naman ning pisan a Kandong, " asinan tala deng puad na, bata mung atin pinangnang-nangnang keng kauran," "Desisyunan mu ne, abe, ngana naman Seung," kabang e ne pa balu ning Tenyente. Pota, ituku ne keni Y Dr.Beltran, tugtugan deng panulu yan, e tane apangan.

Masusora naku keng pamaniabyan da. E re aintindian nung nanu ya kabaldugan ing lugud. E re balu ing lusuk a kapanamdaman ning malugud a menese king peparagul nang sinese. Ing balu ra mu ya ing pakinabang a akamtan da king metung a bague. Itang balamu mo, maki ulaga ya mu kabang pakinabangnan de. Inya ngening mete ne, e ra ne pagsalbatan man, nune buri da ne mung pindangan!

"Ali, abe," ngakung migdesisyun," e taya, kakatatan, nung nu ya miragsa, ken taya ikutkut, ala tamung lalako keng katawan na agyang nanu mu. Ibaldug tayang alang bawas king kulkulan tamung aun!"

At pekiduang ke ing pala. Ding menasa, memaglako na la, uling ing akua rang apangan kang Kapampangan yang talagang pindalan da. Mayap na mu, atin pang mitagan a mapilan a kapanalig a maganakang sinaup mengulkul at mengilibing kang Kapampangan.

Kabud milibing ya Y Kapampangan, linub ko ding gamit ku king pamanasik king kamalig. Lingkul ko ding guyud at lubid nang Kapampangan, saka ko sinabit king dalig. King metung a suluk, sinabit ke ing aswe, a balamu wari larawan ne ning Lira ning metung a Watas a e na dalit pang pasibayu. King kangatbang suluk, sinabit ke ing sarul, a balamu wari, larawan ne ning pluma na ning metung a talasulat a e na pasibayung sumulat pang kawatasan Uling ing atyu keng lub ku, yaring itang mete ne Y Kapampangan, e na ku talbug pang pasibayu king marangle. E na ku manasik pang pasibayu!

Aku man, milako naku diwa king bie. Ala nakung pagmayabang! Ala nakung ganang mananaman pa king marangle. Pati pamangan ampon pamanudtud, e na maniaman a anti ing sadya. Apansin nang Ima ing kanakung pamagmalun. Pigaganakan na ing kumuyad ku naman a bie, at mangari ku kang Kapampangan. Inia, pekisabian ne ing pisan a Ramon, a ituki naku sa king Menila, at yabe na ku king obra ra karing makina. Ila na kanung balang manupa keng pamagpatanam keng Panaun ning Bibili.

King anyaya nang Kong Ramon, tinuki kung meki-pagobra king San Juan Rizal. Ing Amu ming Insik mamaniali yang mesirang kotsi, at ila ding kekaming lalarinan. Potang mesamasan nala, at lupa nong bayung gawa, pisasali nalang mal. Mekasaup ing pamangalag tornilyu king pamangalinguan king bie na ning marangle. At kabang ala ku king baryu, abalitan ku namu, king ing Tagalog nang Seung yang mag-ari karing damulag, at ing Tagalog nang Mang Caesar maralas ya ngeni king baryu at yang mag-ari kareng kayanakan. Makalunus-lunus ing milyari, karing damulag kase, ala nang mitagan a atin pang bayag--- at maguing karing kayanakan, balamu wari makanian na naman, pitakutan de Y Tagalog.

Milabas ing panaun.

Dinatang ing panaun ning dadara. Mikatagun minuli kung menapa king baryu. Kabang dadaran dang talyadora ing tauling mibili, dinatang ya Y Jose Baraku kayabe ne ing anak nang Y Pataling. Atin yang tatairan a biseru Y Pataling at buri ne kanung paglibe pale. Tambing keng aburi bikas ing biseru, lalu na, timbang ya pa naman a balangkas. Ala ya pang lagyu ing damulag nung e biseru, uling e ya pa mekintal at eya pa mekapun. Kaibat kung sinangguni king Matua, libayan keng apulung kaban a B-3 ing biseru nang Pataling.

Kabud kayari ning dadaran, tinipun ko ding anggang sinaup. Belita ku karela king manasik kung pasibayu. At king pamitipun aita, agyang e ya pa mekintal, ampon ala keng lub ku ing pakapun ke, dininan mi neng lagyu ing biserung damulag. Inaus mi yang Kapampangan. Ketang penandit aita, baluku na, king manaya mung ditak a panaun, mika-kayangganan na ing pama-ari na ning tagalog nang Seung. At keni naman Tagalog nang Mastro Caesar, ala nang panaun pang dapat panayan!

"Sabian yu kang Maestro Caesar, " ngakung pepasulapo sabi, " minuli ya Y Kapampangan, at bukas abak, king arap nang bale Matuang Teo, buri keng akasaguan Y Tagalog!"

Kabukasan, ati kami king arap nang bale Matuang Teo, inyang akit miyang dinalan maka-kalesa Y Maestro Caesar, kayabe ne ing asawa na,at Y Tagalog. Agpang kang Atsing Manting a labandera da, paulian da ne kanu Y Tagalog king Menila, pota kanu mapakli ne naman a tagyang keng pamakisaguan!

Kauli ku bale belitanan ke Y Ima ku.

"Ima, mebating ne Y Tagalog, e ke paman meka-piarap milayi ne..... "Makanian pin, Itung", nganang Ima, "magmayabang ka pin bagya, balamu e ka Kapampangan!"

At minta ku king Kamalig. Beba ko ding aswe at sarul, at piglako ko kalawang. Misan pa, atin kung diwang talbug pasibayu king marangle. Nanan me ta yang watas a makidiwang pasibayung lage king marangle ning kawatasan. Ing mayubung timan mamutyawi ya ngeni king kanakung labi, uling balu ku, king ing biserung e pa mekapun, dagul yang metung a matikdi, masikan, masanting, matapang, matatag, at maki-kayabangan. Dagul yang sagisag ning metung a Kapampangan! Dagul yang matapang a kapilan man ala yang pulayan a Tagalog, uling yang matibe kung panata, ing mate na ku pamu, bayu ke pabustan milako bayag Y Kapampangan...
Ing artíkulung ini metung yang súlî. Makasáup ka king Wikipedia kapamílatan ning pámandagdag kaniti.