Villa da reng Papyrus
 |
It has been suggested that this article be merged with Villa da reng papyrus. (Discuss) |
Ing Villa da reng Papyrus (Villa dei Papiri king Italianu) metung yang pribadung bale ning lakanbalen (ciudad) a Romanu kanitang minunang panaun, ing 'Herculaneum (current commune of Ercolano) a bandi ning katwangan nang Julio Cesar, i Lucius Calpurnius Piso Caesoninus: ing minunang mengulkul kareti i Karl Weber kanitang 1765. Menibat ya ing lagyu na ketang metuklas a aklatan ketang bale, nung nu la makabili deng libu walung dalan a mengaduluk (1,800) a scroll a gawa king papyrus.
Atin yang apat a pisu o palapag (level), a makasamasan antimong terrace, itang villang atyu king bebe dagat, at pilang dalang metru manibat ketang pekamalapit nang kasiping a bale. Iti ing maluhung diling bale king mabilug a Herculaneum ampong Pompeii. Atin yang pikawen (swimming pool), fountain, at mitikdong maki danum (water features). Atin ya muring mitipun a esculturang maki misnang katas a calidad, at keraklan kareti, makasinup la king en:Naples.
Anyang mamakbung ya ing Vesuvius kanitang 79 AD, makaimpaqui ne kareng lulanan a makasadya ra nang iyalis king ligtas a lugal ining misnang ulagang aklatan. Nanupata, aunan ne ning pamanagus a lulwal king vulcan. Bandang tawli, manga 30 m ning abung ibat king vulcan. Meduluk la reng scroll, dapot miligtas la murin anyang mesyas at meging tuff ing abu. Ini mu kabud ing aklatan ibat king panaun a classsical kanitang minuna ing miras king panaun tamu.
Metung yang taung matas pegaralan i Lucius Piso, at metung ya kareng susuporta (patron) kareng filosofo (philosopher) ampong poeta. Obra no ing filosofong i Philodemus, a clienti nang Piso, deng dakal kareng obra. Uli na ning e balanci ing laman ning aklatan, isipan dang atin pang scroll a e pa metuklas: king makuyad a salita, ating kadwang aklatan.
Atin pang adwang libu, walung dalan a metru cuadradu (2,800 m² ) ing e pa mekulkul kaniting misnang luhung villa suburbana. King lalam na nitang akulkul da na, atin la pang adwang kukulkulan kanitang decadang 1990, at linto la reng adwa pang pisu king villa, at anti king mebanggit na, mitalakad antimong tuki-tuking terrace, at manibat keti, makalto ya ing dagat.
Ing sangkan nung bakit e pa mekulkul itang aliwa na pang dake ning lugal a iti, uling lalu nang didinan ulaga ning kapamahalan a Italianu ing pamaningat (conservation) at e ing pamangulkul (excavation), at mas intresadu yang manatili itang mekulkul na. Agpang kang David W. Packard, a sasaup king pamanignat king Herculaneum kapamilatan ning kayang Packard Humanities Institute, mapalyaring agyu nang munye pondu para king pamangulkul kabud mabisa la reng manibala, dapot e mipaintulutan ing obra anggang e mayari ing metung a ulat king kapalyaryan (feasibility report), a panayan dang lumwal ketang umpisa ning banwang 2006, dapot e pa mibye iti, anya dakal medismaya la reng dakal a talapanigaral (scholar), mamayun man o laban king pamanyundu king pamangulkul.
Malyari nong basan detang papyrus a mengasilab kapamilatan ning Multi-spectral imaging, metung a paralan a migmula kanitang umpisa ning decadang 1990. King kapamilatan na ning Multi-spectral imaging, dakal la akukwang letratu da reng papyrus kapamilatan da reng myayaliwang filter king sinag a infrared o ultraviolet, a makabage karetang particular a wavelength ning sala. Uli na niti, lalto ing pekayagpang a dake ning spectrum (pangkabilugan a sinag, kareng myayaliwang kule at dake) ba yang luntong malino ing tinta king papil ketang papyrus a menuling. Kapagnasan da reng susuring makasaup la reng CT scan bang mika paralan ba lang mabasa deng maselan a scroll a e pa mibusni ba lang e masira deti.
Kalupa no mong kalupa ning Villa of the Papyri ing orihinal a J. Paul Getty Museum king Malibu, California. Anyang miyalis ya ing museo king Getty Center, misara ya ba reng samasan ing awsan da na ngening "Getty Villa". Mibusni yang pasibayu ketang Enero 28, 2006.
Lon ya murin iti
mag-editSuglung a palwal
mag-edit- The Friends of Herculaneum Society
- Philodemus Project website Archived Agostu 30, 2006 at the Wayback Machine
- Roman Herculaneum website
- "Millionaire to fund dig for lost Roman library" Archived Eneru 12, 2006 at the Wayback Machine, The Sunday Times (London) February 13, 2005
- American Society of Mechanical Engineers: Henry Baumgartner, "New light on ancient scrolls" 2002 Archived Nobyembri 24, 2005 at the Wayback Machine