Galal a Palanca
Ing Galal a Palanca o Palanca Awards (Don Carlos Palanca Memorial Awards for Literature, Galal a Panalalang Don Carlos Palanca king Literatura) ing prestihiyosu at maluat diling galal king literatura o malagung panyulat. Ausan de iting "Pulitzer Prize" ning Filipinas. Atin lang metung o maigit pang simbut a Palanca deng manimuna o pekamaulagang talasulat a Filipinu king Ingles o Tagalug. Sasabian dang ing pamanyambut keti ing tandang mekalub ne king yatu ning panyulat a Filipinu ing metung a talasulat.
Amlat
mag-edit
Mitatag ya ing Palanca Awards kanitang 1950 kapamilatan da reng talapagmana nang Don Carlos Palanca Sr., metung a negosianting migtagumpe king bie kapamilata'ning sipag, sariling pamanigaral, ampong matulid a dapat. Kapagnasan na ning Galal a iting isulung ya ing panyulat a Filipinu kapamilata'ning pamamie galal kareng talasulat ba rang itayis ing karelang talentu bang mikudta king karelang masanting diling obra; ing magsilbing simpanan (treasury) da reng iyas da reng talasulat a Filipinu, at sumaup king pamikalat da reti king malda, lalu na kareng magaral.
Migumpisa ya iti king kategoriang Makuyad a Salita king Inglis ampong Tagalog. Manibat kanita, miragdag la reng kategoriang Dramang Metung a Pinduan (One Act Play) kanitang 1953, Kawatasan o Poesia (Poetry) kanitang 1963, Dramang Maki Ganap a Kaba (Full-length Play) kanitang 1975, Salese o Esai (Essay) kanitang 1979, Nobela (Novel) kanitang 1980, Makuyad a Salita kareng Anak (Short Story for Children) kanitang 1989, Dramang Pangtelebisiun kanitang 1990, ampong w:Screenplay kanitang 1994.
Ketang 1997, atlu lang bayung dake (divisions) deng mibuklat. Deti reng Makuyad a Salita king Ilokánu, Sebuánu ampong Ilonggu. Ba lang magunyat a sumulat deng kayanakan, mibusni ya ing Kabataan (Kayanakan) Essay para kareng magaral king sekundaria o high school ketang 1998. At kanitang 2000, mibuklat ya ing kategoriang Future Fiction, makakawaning kategoria ning makuyad a salitang maki kapagnasang lagpus king angganan ning salukuyan ba yang asuglapan ing paintungulan.
Pikuanan
mag-edit- 50 Years of Palanca Award Winners 1951-2000, Carlos Palanca Foundation, Makati City, 2000
- "2007 Carlos Palanca Memorial Awards Now Accepting Submission" [suglung a mepatad] Retrieved February 17, 2007
- The Don Carlos Palanca Memorial Awards for Literature (Unofficial website). Retrieved August 27, 2005