Don Bosco Pampanga

Don Bosco Academy of Pampanga

Don Bosco Academy, Pampanga logo.png
Motto	Luctor Et Emergo (Latin)
Mitátag	1956-11-18
Uri	Privado, Catolico Salesiano Tecnical a pipágarálan para karéng láláki
Rector	Fr. Renato G. De Guzman, SDB
Vice Rector	Fr. Danny Dadule, SDB
Magaral	Manga 1,400
Lugal	Brgy. Cabalantian, Baculud, Pampanga, Filipinas
Campus	Urban
Kule	Gray  -  Blue  -  White
Palayo	Bosconians
Mascot	Kúlé abung lóbung maki lagyung Grigio
Website/Karinan-Aptas	dbabacolor.one-bosco.org

Ing "Don Bosco Pampanga" (o Don Bosco Academy, Pampanga) métung yang privadong pipágarálan a panlaláking pánibalan da réng Salesiano nang Don Bosco king Filipinas.

Amlat

Ing Don Bosco king Filipinas

Dinatang ya king Filipinas ing Don Bosco aniang 1912, aniang midistinu la king parokia ning Nuestra de los Remedios king Malate, Menila. Kalabas da ring apulung banua, mituldu lang Delegadu at Sekretariu di Rt. Rev. Msgr. William Piani ampo i Rev. Morrow. Lalu yang melino ing misiun da king Filipinas deng Salesianu aniang mituldu yang mumunang Provincial Superior i Rev. Fr. Charles Braga, SDB. Ya ing memuklat king dalan para king metung a permanenting Aguman a Salesianu king bangsa.

Mitátag ya ing mumunang pipagaralan a Salesianu, ing St. John Bosco Academy, kanitang 1951 king Tarlac, Tarlac. Mitikdo ya ing metung pang institusion kanitang 1952 king Victorias, Negros Occidental, at mitukian ya pa kareng aliwang eskuela, detang king Mandaluyong aniang 1953, king Cebu ampo king Makati kanitang 1954, at king Pampanga naman aniang 1956.

Pamitátag

Tetag neng Rev. Fr. Godfrey Roozen, SDB ing Don Bosco Academy king Bacolor, Pampanga kanitang 1958, dapot bayu pa ita, panigobran na ne iti. Inagkat neng Msgr. Guerrero, a yang Obispu ning San Fernando, Pampanga, a mitikdong Bale Salesianu king diosesis. Aniang mumuna, ginamit neng Fr. Roozen ing St. Ferdinand Academy king kabalenan, oneng mika problema. Kulang ing pondu ba yang palakad ing eskuela, at magkasákit la kareng magaral a e mamayad, ania minyara ya itang eskuela kaibat ning pabanua.

Menuknangan ya pa murin i Fr. Roozen, at maintun yang bayung lugal nung nu ya ibili ing eskuela. Ating minaluk lugal kaya, oneng mika problemang pasibayu aniang e la mebisa ketang eskuela detang manupa king gabun. Adua ya pang banuang manintun i Fr. Roozen anggang mikit lang Don Pedro de Leon. Inaluk ne ing metung a loting maki lapad a limang ektaria lipat ning dake nang albugan ning San Fernando. Aniang banuang 1958, mitikdo ya ing mumunang gusali, nung nukarin ya ing kapilia ampong kuartung pipagaralan (classroom) Migumpisa yang miyampang Kalima at Kanam a Balitang (Grade 5 ampong Grade 6) ing eskuela para king elementaria, at Mumuna anggang Kapat a Banua (Year I to Year IV) para kung sekundaria. Aniang banuang 1960, atlu lang pulu't anam (36) deng migmartsa king elementaria, at minie ya muring pamipatune (certficate) para king mumuang lupung (batch) da reng miyaring sekundaria. Mika bunga ing ala nang patugut a pamagpursigi ning talatátag. Mibuklat na ing dalan para king obra da ampong misiun deng Salesianu king paintungulan.

Pamanyulung

Kalabas da reng banua, alang patugut lang miraragdagan deng magaral, ania mitikdo la reng bayung gusali ampong pasilidad. Miragdagan la reng balitang king elementaria, at mika Katlu ampong Kapat a Balitang (Grades 3 to 4). Aniang 1962, mitikdo ya ing kapat a gusali: ing aduang pisung (two-story) Juniorate o Salesian School for Minor Seminarians, nung nu la megambul deng dakal a Pari ampong Brother a Salesianu king Filipinas, at misonariu kareng aliwang bangsa. Kanitang 1963, mitikdo ya ing metung a maragul a gymnasium para kareng aktibidad nang pang-pasinangan (sports) ampong pangkultura ning eskuela. Kilub ning apulung banua, matalik neng daragul ing eskuelang makibat king sisikan a interes king misiun nang Don Bosco.

Mikalat ing kasikatan ning Don Bosco Academy kareng mengalabas a banua. Meragul la reng pasilidad, bayung kaparalanan king kurikulum, ampo ing bilang da reng lulub, ania mengailangan yang i-limita ing bilang da reng tatanggapan dang magaral. Mekilala ya ing Don Bosco king disiplina, pamagsane king relihiun, ampong matas a uri ning pamagaral. Uling ning pamagbayu king direksiyun king pamanuru king Filipinas, migpakilala yang bayung ideya ampong kaparalanan ing eskuela. Mika pamagbayu ing kurikulum king elementaria ampong sekundaria, at meging pamikatagun para king bayung pamagaral ing pamanyane kareng tuturu.

Anyang dekadang 1980 ampong 1990, lalu yang mekilala ing Don Bosco Academy antimong metung a matas a uring eskuelang Katoliku para kareng lalaki. Kayabe king kayang kasikatan ing kayang debosiun kang Maria Saup da reng Cristianu, a meging inspirasiun kareng kayanakan ampong pamilia uli ning kayang lugud antimong indu. Em mu kabud deng estudianti ampong aspirant ing evangelization. Tinanggap la murin king pamiturung Cristianu, kasanayan king pasiknangan (sports), edukasiun ampong saup a pinansial. Maragul ing megi rang tatak king kasalesayan na ampong panyulung ning Pampanga aniang mengalabas a banua ing obra da reng Pari ampong Relihiosung Salesianu.

Pamanalis

Aniang Octubre 1, 1995, uli ning kalamidad a deli ning pamanambun king lahar, mesira at mitambunan ing eganagana king eskuela ampo reng lugal a malapit keti. Tinuknang saguli ing palakad ning eskuela, dapot ing obra para kareng kayanakan taglus-taglus pa murin. Aniang 1995, mibusni ya king komunidad nang Don Bosco ing St. Scholastica's Academy.

Mika donasiun ibat king metung a mayap a talapagkalub, i Tomas Dizon ampo reng meangu bie nang pengari, di Mr. & Mrs. Celestino at Maria Dizon a loting apat a ektaria king Barangay Mabiga king Mabalacat, at karin ya mitikdo ing Don Bosco Academy. Kapamilatan ning ditak a kualta ampo ing kapagnasan a magtagumpe, atikdo de reng Padreng Salesianu ing bayung eskuela. Pasibayu, itang sikanan a mitulak king pamitátag ning eskuelang iti, yang maging inspirasiun king pamisundu king obra na ampong misiun king Pampanga. Kapamilatan ning pamanalis da king pangulu (norti) ning probinsia, daragdagan da reng Salesianu nang Don Bosco ing karelang presensia kareng mas dakal a Kapampangan, a agyagan ning kasebian a Luctor et Emergo!

Siuala

Ing Siuala ing opisial a pahayagan ning Don Bosco Academy-Pampanga ngening milabasan a aduang pulung (20) banua. Kayanib la king diariung iti deng matenakan nang diling talasulut ampong talagulis ning eskuela; keti la magsane deng magaral a maki hilig king pamaniulat ampong pamangulis. Amanu yang kapampangan ing Siuala, a mangabaldugang "bosis". Metung yang kasangkapan ning komunikasiun kapamilatan da reng magaral, pengari, miyari (alumni, talaturu (faculty), Salesianu, ampo ing academy o eskuela. Metung yang karinan nung nu la maliaring basan deng obra maestra da reng makudtang (creative) poeta o watas a Bosconian. Manibat king pabalat, angga kareng larawan ning balang artikulu angga king gulut, makalto ing kabiasnan da king pamangulis deng Bosconian. E na ka mu babalitanan kareng bayung maliliari king eskuela ning pahayagan, nun e dakal ya tampuk a artikulung makalibang babasan. Mitmu ya muring maulagang impormasiun. Bukud kaniti, atin yang dake para kareng pamanatu (greeting section), nung nu la maliaring mangibiling mensahi deng Bosconian kareng buri rang paralan.

Young Galileans Club

Chemicals, scientists, astronomy… yup! You got it right! The Young Galileans are coming your way. These young scientists concentrate not only on matter in the Science Laboratory but also on the welfare of the students, like the Science Jingle Contest. They advocate environmental issues such as waste segregation, campus cleaning and recycling. Truly, the Young Galileans Club in an org with cause.

Kemikal, siyentista, astronomia.. wa pin! Ustu ka! Paratang no reng Young Galileans. Aliwa mu ing sangkap (matter) king Science Laboratory ing didinan dang pansin dening siyentipikung kayanakan, nun e pati ing kayapan da reng magaral, alimbawa king Science Jingle Contest. Mitataguyud la kareng isiung pangkapaligiran anti ing pamikawani king dinat (waste management), pamaglinis king eskuela, ampo ing pamangamit pasibayu (recycling). Tutu ya ping aguman a maki parasan ing Young Galileans.

Teatro Busko

Metung yang aguman da reng magaral a maki talentu ing Teatro Busko. Sasanayan na la reti king pamanarti, pamagkanta, pamanerak ampong makudtang pamanisip (creative thinking). Dakal ne pepalage ing aguman a iti. Metung ya kareng kailangan king agumang iti ing tiyaga o pamagpasensia.
Pamuntuk: Dungca, Paul Kaduang Pamuntuk: Enriquez, Ephraim

Damla't Talindo (Mission and Vision)

Ikami, ing Komunidad a Tuturu ampong Pastoral ning Don Bosco Pampanga, akakit mi la reng kayanakan antimong taung kayanib antimong talasuyu-pekapun (servant-leaders) ning Pisamban da reng Pakakalulu.

Mangaku kaming - iyuna la reng kayanakan a kalulu, melakuan, at atiu king panganib - munie pamagaral a Cristianu at Catolicung pangkabilugan paglalawe (holistic) at piyagum (integral) - munie matas a uri ning pamagaral busal ning Salesian Preventive System - itanam karela ing lugud king pamilia, pamalenan/komunidad ampong bangsa - makiugnayan kareng eganaganang magobra kareng kayanakan - tairan la ba lang maging taung gumamit king upaya rang mamili - gamitan ing kabiasnan a mipagkalub karela bang magsilbing kasangkapan ning pamagbayu ning sosiedad. Ampong - ipagkalub karela ing beluan king teknolohia ampo reng kasanayan bang maging magamitan a kayanib ning sosiedad/ketawan

Lon la murin deti

• Don Bosco Technical College
• Don Bosco School, Manila
• Don Bosco Technical Institute, Tarlac
• Don Bosco Technical Institute, Victorias