Ari Ning Parnaso, sinulat ne ing keyang aklat PANINAP NING MAKAGISING, Vedasto D. Ocampo, King of Parnasus Literary Gem ketang Banwang 1994.
Mibayit ya San Pedro, Magalang, Kapampangan ketang Ka-11 nang Aldo ning Agosto, 1925. Ketang Domingu, mewala ya biye ing Ari ning Parnaso, (mayayaus Tatang Viding karing makayanak nang kabalen), nganing balita ning VP, HAU at Direktor ning DJNCKS Robby Tantingco. Makirame kami karing likwan ning Meanguabie, pamilya ampo karing kayabe na AGTAKA at AKKAP.
Ketang pelimbag ne ing mesambitlang aklat atitimpla nane ning Ari ing maybug nang mapunding sulu anya pigsadya nane kanu ing dalan nang pauli karin Poeta ring sablang poeta, king Ginung linalang kaya. Agpang king pesulatan nang talambiye i Edwin N. Camaya, kayabe na Akademyang Kapampangan.
Akademyang Kapampangan, piyabe reng pigmalasakitan Tatang Viding ampo'y Doktora Evangelina H. Lacson, pauli ning lugud da king Indung Kapampangan ampon paulaga at galang karing pepamana king makasalesayan Akademya, ri Don Zoilo Hilario, Monico Mercado, Amado Yuzon, Amung Reverendo Quirino Canilao a tikyan da ri Jose Gallardo at aliwa pa, antimo ri Pangulung Diosdado Macapagal. Ketang Marsu Ka-14, panbanwa neng meko i Imang Neni o Doktora Lacson, (a minampang kopya king mesabing aklat nang Tang Viding king anak ku; keni ko ikit ing panga-lakambini at kadalise na pusu Imang Neni.). Miyabe la kanyan pasibayu karin Banwa dening adwa, Tang Viding at Imang Neni. Ila ding mitmung sipag at kapibabatan misadsad king lakaran ning AKKAP bangkanita e mate ing Kalinangan Kapampangan lakwas na ing Malagung Panyulat. Migaga la pa kaya? Ali nala pauli ning ala nala ding palpikasala karin.
Alang angganang lugud at legwan ing piyaben da karin ila ri Abogado Serapin Lacson at ding anggang mitalakad king Akademya. Mapoetang pamanyagana libutad ning banglu at tigtig da ring sablang angeles Ligaya Banwa, ing matas pa king taluktuk ning Parnaso, Athena. Posted by Aida T Aguas April 27, 2009 at 3:17 AM
